Sorry, this entry is only available in galego and Español. For the sake of viewer convenience, the content is shown below in this site default language. You may click one of the links to switch the site language to another available language.
Como cada 31 de agosto a parroquia de O Allo celebra o San Ramón. E co fin de continuar coa recuperación desta romaría tan popular entre a nosa veciñanza, o Concello de Zas deseñou un programa de actividades, en colaboración coa Deputación da Coruña, que se desenvolverá o propio día da festa na contorna do pazo das Torres do Allo.
Entre as 11:00 e as 15:00 horas haberá diferentes postos de artesanía da zona (liño, encaixe, xoias, instrumentos musicais, cesteiría, palla, debuxos feitos con café, complementos,…). Esta é unha romaría para toda a familia, así que a partir das 12:00 horas realizaremos un obradoiro infantil de barro para o que é necesario anotarse en calquera destes números de teléfono: 981 75 13 98 / 981 71 80 56. Ao longo da mañá tamén haberá demostracións sobre a montaxe de pandeiretas, elaboración de cestos e de creacións con palla trenzada.
Tamén teremos música ao vivo e iso das 13:30 horas o grupo “Tres Pesos” ofreceranos un concerto cheo de sentimento, rítmo e cor que amosa sen complexos a vitalidade e a contemporaneidade da nosa música de raíz. Toda unha reivindicación da música como necesidade vital do ser. Os doce temas que o compoñen son unha aposta por amosar a potencialidade de boa parte das mesturas tímbricas existentes na nosa tradición viaxando dende as melodías de gaita, clarinete e acordeón ata as inmensas posibilidades das percusións tradicionais e das nosas voces, tanto monódicas como polifónicas
E despois darémoslle paso ás tradicionais merendas de campo nun espazo habilitado para este fin e ao que se poden unir todas aquelas persoas que o desexen coa súa propia comida. Tamén haberá unha pulpeira, que estará instalada diante do bar-restaurante das Torres do Allo.
