Sorry, this entry is only available in galego and Español. For the sake of viewer convenience, the content is shown below in this site default language. You may click one of the links to switch the site language to another available language.
O vindeiro mes de maio arrincan as actividades escolares propias das Torres do Allo con visitas didácticas e obradoiros para cada ciclo.
Tódolos venres, o Pazo do Allo estará aberto para que os centros escolares poidan visitalo con reserva previa.
A Concellería de Cultura do Concello de Zas ten listo un ambicioso programa didáctico para o monumento das Torres do Allo. A partir do vindeiro mes de maio arrincan as actividades didácticas propias do pazo que se realizarán os venres baixo reserva dos centros educativos.
As Torres do Allo é un lugar idóneo para realizar unha visita escolar nun entorno natural, auténtico e estimulante. A través das visitas didácticas, adaptadas a cada ciclo educativo, o alumnado descubrirá os valores artísticos, históricos, medioambientais, científicos e etnográficos que atesoura o Pazo do Allo e tódolos elementos que compoñen o ben.
As visitas educativas ás Torres do Allo complétanse cunha variada oferta de obradoiros didácticos adaptados a cada ciclo escolar. Para o ciclo de Infantil haberá un taller de plantación de sementes chamado “Sementes do Allo”. Os cursos de 1º a 4º de Primaria poden optar por facer o obradoiro de tecido artesán “Tecendo a miña roupa”. Para 3º a 6º de Primaria hai preparado o circuíto de probas a “Xincana do Allo”; e o alumnado de 5º de Primaria a 4º da ESO poderá optar por aprender todo sobre os escudos heráldicos co obradoiro “Escudo de Familia”.
Os centros educativos poden descargar o Cartafol Escolar no menú “Visitas/escolares” onde atoparán tódolos detalles relacionados cos obradoiros e visitas didácticas. Tódalas actividades, visitas e obradoiros son de balde. Tamén poden informarse a través do enderezo electrónico info@torresdoallo.gal.