Sorry, this entry is only available in galego and Español. For the sake of viewer convenience, the content is shown below in this site default language. You may click one of the links to switch the site language to another available language.
O Mercado de San Ramón volve ás Torres do Allo con artesanía e música tradicional
As Torres do Allo, en Zas, acollerán unha nova edición do Mercado de San Ramón o vindeiro domingo 31 de agosto. Esta cita, xa imprescindible no verán da Costa da Morte, encherá o histórico recinto de artesanía, música e tradición popular, nunha xornada pensada para toda a familia.
Organizado polo Concello de Zas coa colaboración da Deputación da Coruña, o evento celebrarase de 11:00 a 19:00 horas e reunirá a artesáns, músicos e visitantes nun ambiente único.
Un programa completo para gozar do día
Durante toda a xornada, o Mercado de Artesanía ofrecerá a oportunidade de coñecer e adquirir pezas únicas, ademais de participar en actividades e obradoiros:
- 12:00 h: Obradoiro de modelado de barro, para o que se require inscrición previa no 981 718 056.
- 14:30 h: Concerto de Unto Vello, un dúo de música tradicional formado por Bieito Pereira e Xabi Gómez, que actuarán con voces, acordeón e percusión.
- 15:30 h: Xa é tradición, volven as merendas campestres! Anímaste a comer de campo no xardín do pazo ou nos prados da contorna?
- 17:00 h: Obradoiro familiar “Creasóns”, no que o artista Cé Orquestra Pantasma ensinará a crear instrumentos musicais con materiais naturais e de refugallo, estimulando a creatividade dos participantes.
- 18:00 h: Concerto de Cé Orquestra Pantasma, que recupera a figura do “Home Orquestra” cun espectáculo cheo de ritmo, forza e fantasía onde o público se converte no protagonista.
Ademais, ao longo de todo o día, haberá unha demostración de fabricación de pandeiros, para coñecer de preto o proceso artesanal dun dos instrumentos máis emblemáticos da nosa música.
Non perdas esta cita no calendario e goza dunha xornada chea de creatividade e cultura nun dos espazos patrimoniais máis fermosos da comarca.
